NGEKE... NGITHI NGEKE!

Ngiphaphame sengathi kuyasa
Yebo, kumnyama uma kuzokusa
Kodwa lokhu sengathi kwedlulele
Kodwa lokhu kuya njalo kuqina.
Ngithi ngeke, akunjena uma kuzokusa.

Ngithe ngingabon' ukuth' akusi,
Ngasho qede ngawuhlaba ngawulawula.
Ngisho ngengila qede kwavela mveli-ivelayo.
Ngumdondoshiya wensizwa,
Isho ngesikhumb' esikhany' igazi.
Ngabuza, "Ungubani wena na?"
Waphendula, "Ngingukukhany' okukhulu,
Mina ngimel' ilang' okumele liphume."

Ngajabula ngob' okuningi ngakubona.
Ngazitshela ukuthi sengiyazi.
Ukwazi kwaba ukuzitshela.
Ukuzitshela kwaba ukwazi.
Ngisho phela ukwazi kokungazi.
Lokho ngikusho ngoba akusasi.
Noma ungathini, ngithi ngeke.

Kudum' izulu kwaxeg' amadolo.
Amadoda ahanjiswa izisu.
Ngikhuluma nje akukasi,
Baphelil' abant' ukukhany' okungakhanyi.
Duklu! Bhibi! Mihli! Dikli!
Nguban' onecala, ophil' uthathile.
Ngithi kuhle yini uma kungasi?
Uthul' esilususayo luvimb' ilanga.
Ilanga lingaphuma yini uma silixosha?
Cha, phinde mina ngithi angeke.

Ubusuku bumelwe ukuxoshwa ilanga.
Ngelinjani leli langa eliluvindi na?
Ngenxa yobusuku sengingubhova.
Ngish' ubhova oboshwe ngeketango.
Yisho phela, ingani angivumi,
Angivumi ukuboshwa qede nginikw' izinsalela.
Ithi ingaba nkul' ingazekeki.
Ithi ingadl' ithambo yejwayele.
Ngiyaphinda ngithi lutho olubaziwe.

Kangiyen' udoli wezidwedwe.
Ngakho ngingevum' ukugidiswa.
Ukusiniswa yinto yokugcin' engenzeka.
Ngakho ngithi mkhuzeni,
Mkhuzen' akhuzeke bo!
Elakh' ibala alimel' ukukhanya,
Nelami ngokunjalo alimel' ubunyama.
Mina naye siyafana,
Ngakho makangangenzi isilima.
Mina naye simuntu munye,
Mina naye singabaka Mvelinqangi.
Uma eqhuba ngale ndlela,
Ngithi ngeke, isiminingi le minyaka.

BUYINI UBUMINA?

Kangazi...
UNkulunkulu osemafin'
Owaziyo.

Ngingahamba ngizishay'-
Isifuba, keph' okuyimi
Akukho.

Ngithe ngikhula,
Bangibabaz' ukukhula,
Ukukhula okungasho lutho,
Keph' usizi nokuhlupheka.

Okuyimina kakukho,
Nginikw' ithub'-
Eliyivelakacane... lokuphila,
Kepha ngifana nongekho.

Noma ngabe ngenzani,
Kuphelel' eboyeni okwesithukuthuku
Senja.
Kwenza ngingazi
Nqindi nasibhakela.

Abantu bangitshel'
Ukuthi nginokuzazisa
Kobumina, ubumina
Lob' obungekho... nguNkulunkulu
Yedw' owaziyo.

Ayikh' int' eyimina
Ngifile ngiphila
Ngiyafana nongakaz'-
Azalwe.
Lokho kufakazelw'-
Imizam' ephelel'-
Eboyen' okwesithukuthuku
Senja, imizam'-
Eshabalalis' okwamazol'
Ebon' ilanga...
www.mshanduenterprise.co.za

"Intandela"

Tweet
Ngizibinil' izigemegeme-
Nezimanga zenzeka.
Ngikubon' uhlanganis'-
Amabhungu namatshitshi.
Ngikubon' uhlanganis'-
Izizwe ngezizwe.
Kepha mina...? "INTANDELA."

Luthand' ungumanqoba-
Phakathi kowesilisa nowesifazane.
Ngawe yakhil' imizi
Ngawe zizelw'-
Izintombi nezinsizwa
Kubuhlungu...
Ukuthand' umuntu.

Luthand' ubuhlungu-
Uyantshuntshutha
Kepha..., uzwiwa-
Ngongaphakathi kuye
Khanyis' ukuze-
Izizwe zonke zikubone.

Ngikuzwil' ungena ngomcathulo-
Wesalukazi.
Ngakuzw' unuka kamnandi-
Kuhle kwembali yasekuseni
"INTANDELA" yayibopha-
Kuhle kosing' inhliziyo-
Yami!
Ngikhulule! Funa ngembuke.